လၢႆးလၢင်ႉၶေႃႈမုလ်းၼႂ်းၾူၼ်းငၢႆႈငၢႆႈ မိူဝ်ႈပႆႇဢဝ်ၵႂႃႇၶၢႆ

တႅမ်ႈ - ၸၢႆးတႆးမၢဝ်း

သင်ဝႃႈၶႂ်ႈၶၢႆ ၾူၼ်း Samsung ၶိူင်ႈၵဝ်ႇၼႆၸိုင် မိူဝ်ႈပႆႇလႆႈ ၶၢႆဢွၵ်ႇတၢင်းၼွၵ်ႈၼၼ်ႉ ထုၵ်ႇလီလႆႈလၢင်ႉပႅတ်ႈ ၶေႃႈမုလ်းၵူႈလွင်ႈ ႁႂ်ႈမူတ်းၵဵင်ႈၼၼ်ႉၵူၺ်း၊ ၼင်ႇႁိုဝ်ၶေႃႈမုလ်း မိူၼ်ၸိူင်ႉၼင်ႇ ၶေႃႈၵႂၢမ်း ၼႂ်း SMS ၊ သဵၼ်ႈၸိုဝ်ႈမၢႆၾူၼ်း၊ ၶႅပ်းႁၢင်ႈ၊ ဝီးတီးဢူဝ်း၊ ၵႂၢမ်း လႄႈ ၾၢႆႇ(File) ဢိၵ်ႇ ၽိုၼ်လိၵ်ႈၽိုၼ်လၢႆး ဢၼ်လမ်ႇလွင်ႈ တေဢမ်ႇလႆႈတူၵ်းၼႂ်းမိုဝ်း ၵူၼ်းတၢင်ႇၵေႃႉၼၼ်ႉ မီးလၢႆးလၢင်ႉ ဢၼ်ငၢႆႈငႅမ်ႈမၼ်းယူႇ။

ဢွၼ်တၢင်းသုတ်းတႄႉ သင်ၸဝ်ႈၵဝ်ႇ ၶႂ်ႈလႆႈၶိုၼ်း သဵၼ်ႈၸိုဝ်ႈမၢႆၾူၼ်း လႄႈ Application ဢၼ်မီးၼႂ်းၶိူင်ႈၵဝ်ႇၼၼ်ႉ ထုၵ်ႇလႆႈၸႂ်ႉ ဢိၼ်ႇတၼႅတ်ႇ 3G/ 4G/ WiFi ၵပ်းသိုပ်ႇတင်ႈ Google Account သေႁဵတ်းပၼ် Sync ၊ ပေႃးယဝ်ႉ ၶၢႆႉၶေႃႈမုလ်းၵူႈလွင်ႈ ဢၼ်မီးၼႂ်း တူဝ်ၶိူင်ႈၾူၼ်း (Phone Storage) ၶဝ်ႈၵႂႃႇ ၵဵပ်းသိမ်း(Backup) ဝႆႉၼႂ်း SD-Card ဢမ်ႇၼၼ် ၼႂ်းၶွမ်ႇပိဝ်ႇတိူဝ်ႇ ၶႃႈတႃႉ။

သိုပ်ႇၼၼ်ႉ ၶိုၼ်းဢိုတ်းပႅတ်ႈၾူၼ်း ၸဝ်ႈၵဝ်ႇ ၵမ်းၼိုင်ႈသေ ပိုတ်ႇဢဝ် Micro-SIM-Card လႄႈ SD-Card ဢွၵ်ႇၵဵပ်းသိမ်းဝႆႉ လီလီယဝ်ႉ မႄးပိုတ်ႇၾူၼ်းၶိုၼ်းမႃး ၶႃႈတႃႉ။

ပေႃးမိူဝ်ႈႁဝ်း ၵဵပ်းသိမ်းၶေႃႈမုလ်းၵူႈလွင်ႈ ဝႆႉယဝ်ႉလီငၢမ်းၼၼ်ႉ ၵမ်းၼႆႉထိုင်ၶၢဝ်းတေလႆႈ လၢင်ႉၶိူင်ႈ (Factory Reset) ပုၼ်ႈတႃႇႁႂ်ႈၶိူင်ႈၾူၼ်း မႄးႁပ်ႉတင်ႈၶိူင်ႈမႂ်ႇမႂ်ႇ လႄႈ လၢင်ႉၶေႃႈမုလ်း ဢၼ်ၵဵဝ်ႇၵပ်း ၸိူဝ်းႁဝ်းၸႂ်ႉတိုဝ်းၼၼ်ႉ ဢွၵ်ႇပႅတ်ႈ ၼႂ်းၾူၼ်းႁဝ်း မူတ်းမူတ်းၼၼ်ႉၵူၺ်း။

ၶၵ်ႉတွၼ်ႈလၢႆးႁဵတ်းမၼ်းတႄႉ ၶဝ်ႈၵႂႃႇတီႈ Settings ပေႃးယဝ်ႉၵႂႃႇတီႈ Accounts သေလိူၵ်ႈႁႃ တီႈမီးၸိုဝ်ႈဝႃႈ Backup and Reset ယဝ်ႉၵေႃႈၼဵၵ်းပၼ်တီႈ Factory Data Reset တေႁၼ်ဢွၵ်ႇမႃး Reset Device ပေႃးယဝ်ႉ သိုပ်ႇလူပ်းပႅတ်ႈတင်းမူတ်း Delete All လႄႈ ၶိူင်ႈၾူၼ်းၸဝ်ႈၵဝ်ႇၼၼ်ႉၵေႃႈ တေမွတ်ႇသေပိုတ်ႇမႂ်ႇ (Restart) ယဝ်ႉၶဝ်ႈသူႇၵၢၼ်တင်ႈၶိူင်ႈမႂ်ႇ မိူၼ်ၼင်ႇမိူဝ်ႈတိုၵ်ႉသိုဝ်ႉၾူၼ်းမႃး မႂ်ႇမႂ်ႇ လူၺ်ႈၶေႃႈမုလ်းၵဝ်ႇၵဝ်ႇ ၼၼ်ႉၵေႃႈ တေႁၢႆပႅတ်ႈမူတ်းမူတ်း ယူႇယဝ်ႉ။

ၵမ်းၼႆႉတႄႉ ၶေႃႈမုလ်းၵဝ်ႇၼႂ်းၾူၼ်း ၸိူဝ်းၼၼ်ႉ ထုၵ်ႇလၢင်ႉပႅတ်ႈမူတ်း ယဝ်ႉလႄႈ ၸွင်ႇၶေႃႈမုလ်းၸိူဝ်းၼၼ်ႉ တေၸၢင်ႈပိုၼ်ၽႄႈ ဢွၵ်ႇၵႂႃႇတၢင်ႇတီႈလႆႈ ၼႆၼၼ်ႉၵေႃႈ ၸဝ်ႈၵဝ်ႇဢမ်ႇလူဝ်ႇလႆႈ ဝူၼ်ႉၵႂင်ၸွမ်းယဝ်ႉ။

ဝၢႆးၼၼ်ႉ ၸဝ်ႈၵဝ်ႇ ထုၵ်ႇလႆႈမႄးၸဵတ်ႉပၼ် ၾူၼ်းႁဝ်းၶႅမ်ႉၶႅမ်ႉ ႁႂ်ႈဢွၵ်ႇၾၢင်ႁၢင်ႈႁၢမ်ႉမႂ်ႇသေ ဢဝ်ၵႂႃႇၶၢႆပၼ် ပီႈၼွင်ႉဢူၺ်းၵေႃႉ ဢမ်ႇၼၼ် ဝၢင်းၶၢႆၼႂ်းလၢၼ်ႉ လႄႈ ပၼ်ႁႂ်ႈတၢင်ႇၵေႃႉ ၸႂ်ႉတိုဝ်း လႆႈယူႇယဝ်ႉ။