ယႃလိုမ်းပဵၼ်ၶိူင်ႈမိုဝ်းလီ ပုၼ်ႈတႃႇၵူၼ်းႁၢႆႉၶဝ်ၼႆ ၸွင်ႇၸႂ်ႈတေႉယူႇႁႃႉ

တႅမ်ႈ - ယႃၸွမ်ႇၵွမ်ႇ

ၵမ်ႈၼမ်တေၵႆႉယၢမ်ႈလႆႈငိၼ်းၵၼ်ဝႃႈ ၼၢင်းယိင်းလႄႈလုၵ်ႈဢွၼ်ႇ ၸၢင်ႈၵႆႉၺႃးယႃလိုမ်းတူဝ် တီႈၵူၼ်းႁၢႆႉၶဝ် မိူၼ်ၼင်ႇ ၵူၼ်းႁေႃႈရူတ်ႉၸၢင်ႈ (Taxi) ဢမ်ႇၼၼ် ၸုမ်းလၵ်ႉလုၵ်ႈဢွၼ်ႇ ၸိူဝ်းၼႆႉ တိၺွပ်းဢဝ်တူဝ်ၵႂႃႇ ဝႃႈၼႆ။

လၢႆးမၼ်းတႄႉ ယၢမ်ႈငိၼ်းဝႃႈ ၶဝ်တေဢဝ်ယႃၼၼ်ႉ မႃးတႃးသႂ်ႇၽိဝ်ၼိူဝ်ႉ သေတီႈတီႈ ဢမ်ႇတၼ်းထိုင် လၢႆမဵတ်ႉ(မိၼိတ်ႉ) ဢွၼ်ႇၵူၺ်းၵေႃႈ ၵေႃႉထုၵ်ႇၺႃးယႃၼၼ်ႉ တေလိုမ်းတူဝ် ဢမ်ႇမီးသတိသေ ၸၢင်ႈၵႆႉထုၵ်ႇၺႃး ၵၼ်ႉၸၼ်လူလၢႆ လႄႈ ထုၵ်ႇႁဵတ်းႁၢႆႉတူဝ်ၶိင်း ၸိူဝ်းၼႆႉ ယဝ်ႉ။

သင်တေလၢတ်ႈတေႉတေႉၸိုင် ယႃလိုမ်းဢၼ်ဝႃႈၼၼ်ႉ မီးတေႉယူႇႁႃႉ ၾၢင်ႁၢင်ႈမၼ်း သမ်ႉပဵၼ်ၸိူင်ႉႁိုဝ် ၵူၼ်းႁၢႆႉၶဝ် ဢဝ်မႃးတီႈလႂ် ၶေႃႈထၢမ်ၸိူဝ်းၼႆႉ တေလႆႈႁူႉၶေႃႈတွပ်ႇမၼ်း လွင်ႈဝႃႈ ယႃလိုမ်းဢမ်ႇလႆႈမီးတေႉ သင်ၼႆယဝ်ႉ။

မေႃယႃၽၢႆႇလူင်ႉလႅၼ်ႇ ၸႂ်ႉတိုဝ်းယႃလိုမ်းၶဝ်တႄႉ ယိုၼ်ႈယၼ်လၢတ်ႈဝႃႈ ထိုင်တီႈဝႃႈ ယႃလိုမ်းတႃႇတႃး ၽၢႆႇၼွၵ်ႈတူဝ် မီးတေႉၼႆၵေႃႈ တႃးယဝ်ႉဢမ်ႇၸၢင်ႈလိုမ်းတူဝ် လႆႈၵမ်းသိုဝ်ႈ မိူၼ်တီႈႁဝ်းယၢမ်ႈလႆႈငိၼ်းမႃး ယွၼ်ႉဝႃႈ ၼင်ႇႁိုဝ်ယႃ ပေႃးတေၸၢင်ႈၸိုမ်းၶဝ်ႈ ၼႂ်းၼိူဝ်ႉလိူတ်ႈသေ ၵိုင်ႉၵၢင်ႉလိုမ်းတူဝ်ၵႂႃႇၼၼ်ႉ လႆႈၸႂ်ႉၶၢဝ်းယၢမ်းတင်းႁိုင်ယူႇ။

ပေႃးၼၼ် သမ်ႉတေၶႂ်ႈထၢမ်ဝႃႈ မိူၼ်ၼင်ႇၵူၼ်းၵမ်ႈၽွင်ႈ ၸိူဝ်းၺႃးယႃလိုမ်း ၵူၼ်းႁၢႆႉၶဝ်ၼၼ်ႉလူး ၸႂ်ႈတေႉယူႇႁႃႉ သမ်ႉပဵၼ်ယႃၸိူင်ႉႁိုဝ်။

ၵႂၢမ်းတွပ်ႇၵေႃႈ လႅပ်ႈတေပဵၼ်ယႃလိုမ်း မဵဝ်းလႆႈၵိၼ်ဢဝ်ၵူၺ်း ၵူၼ်းႁၢႆႉၶဝ် တေလၵ်ႉဢဝ်သႂ်ႇလေႃး ၼႂ်းၼမ်ႉ ဢမ်ႇၼၼ် တၢင်းၵိၼ် မိူဝ်ႈႁဝ်းဢမ်ႇႁူႉတူဝ် ၼၼ်ႉယဝ်ႉ၊ ၵမ်ႈၼမ် ၼၢင်းယိင်းလႄႈ လုၵ်ႈဢွၼ်ႇ ၸၢင်ႈၵႆႉလႆႈပဵၼ်ယိူဝ်ႇ ၵူၼ်းႁၢႆႉၶဝ် ပိူဝ်ႈၼၼ်လႄႈ ထုၵ်ႇလီသင်ႇသွၼ် လုၵ်ႈလၢၼ်ဝႆႉလီလီ ၼၢင်းယိင်းၶဝ်ၵေႃႈ တေႃႈၼၼ်ယဝ်ႉ ပေႃးပဵၼ်ၵူၼ်းပႅၵ်ႇၼႃႈ ဢမ်ႇႁူႉၸၵ်းၼၼ်ႉ ယႃႇဝႆႉၸႂ်သေယုမ်ႇပိူၼ်ႈငၢႆႈ ယႃႇၵိၼ်တၢင်းၵိၼ်လႄႈ ၼမ်ႉၸဵမ်းဝၢၼ် တီႈၶဝ်လဵင်ႉၼၼ်ႉလႃးလႃး ၼႆႉပဵၼ် လၢႆးႁေႉၾၢင်ႉလီတီႈသုတ်းယဝ်ႉ။

ဢိင်တီႈ - Drama-Addict Facebook Page