ယွၼ်ႉဝႃႈ Blogger ၼႆႉ ငၢႆးမိူၼ်ၵၼ်တင်း Web Site လႄႈ ႁူႉဝႃႈၽႂ်ၽႂ်ၵေႃႈ တေၶႂ်ႈမီး Site သုၼ်ႇတူဝ်ၸဝ်ႈၵဝ်ႇ ယူႇႁင်းၵူၺ်းၽႂ်မၼ်း လႄႈ ဢမ်ႇႁႂ်ႈၶႂ်ႈ ဢူၺ်းၵေႃႉႁဝ်းၶဝ် ၼင်ႈလဵၼ်ႈၾဵတ်ႉပုၵ်ႉၶ် ၼိူဝ်ဢွၼ်ႇလၢႆး သုမ်းငိုၼ်း သုမ်းၶၢဝ်းယၢမ်း ပႅတ်ႈလၢႆလၢႆ ၼႆသေ မိူဝ်ႈၼႆႉ ၶႃႈႁဝ်း ၸင်ႇပဵၼ်မႃး တႅမ်ႈၼႄ လၢႆးသၢင်ႈ Blog Site ပုၼ်ႈတႃႇဢူၺ်းၵေႃႉႁဝ်းၶဝ် ယူႇယဝ်ႉ။
ၸဝ်ႈၽူႈၵတ်ႉၶႅၼ်ႇ လူင်ႉလႅၼ်ႇ ၽၢႆႇ Site ၼႂ်းတႆးႁဝ်းၵေႃႈ မီးတင်းၼမ်တင်းလၢႆ ယူႇသေတႃႉ ၵူၺ်းၵႃႈ ဢမ်ႇပေႃးၵႆႉႁၼ် ၽႂ်ပိုၼ်ၽႄႈၼႄပိုၼ်ႉႁူႉ ၽၢႆႇလွင်ႈၼႆႉၵႃႈႁိုဝ်၊ ၸိူဝ်းပိုၼ်ၽႄႈၵေႃႈ မီးဢဝ်ၵမ်ႈၽွင်ႈၵူၺ်းလႄႈ ပုၼ်ႈတႃႇတေပဵၼ်ႁႅင်း ထႅင်ႈၽၢႆႇၼိုင်ႈသေ ပေႃးတေၸၢင်ႈၸွႆႈ ယိုၼ်းမိုဝ်းၸူးထိုင်လႆႈ ဢူၺ်းၵေႃႉႁဝ်းၶဝ်ၵူႈၵေႃႉ ၼၼ်ႉ ၶႃႈႁဝ်း ၸင်ႇလႆႈႁဵတ်းၵဵင်ႈ မိူၼ်ႁူႉမေႃလီသေ ၶတ်းၸႂ်တႅမ်ႈဢွၵ်ႇ ၽၢႆႇသႃႇသႃႇတႆး မႃးယူႇၶႃႈယဝ်ႉ။
Blogger ၼႆႉတႄႉ ၸဝ်ႈၵဝ်ႇမီး G-mail Account ဢွၼ်ႇ ဢၼ်လဵဝ်ၵူၺ်းၵေႃႈ သၢင်ႈ Blog Site လႆႈပဵၼ်လၢႆဢၼ် လူးၵွၼ်ႇယဝ်ႉ၊ လၢႆးသၢင်ႈ Blog Site မီးလၢႆလၢႆးယူႇသေတႃႉ ၵူၺ်းၵႃႈ ၶႃႈႁဝ်းတေမႃးၼႄ လၢႆးဢၼ်ငၢႆႈမၼ်း ပၼ်ဢူၺ်းၵေႃႉႁဝ်းၶဝ် ၵႂႃႇယူႇ။
ဢွၼ်တၢင်းသုတ်းတႄႉ ၶဝ်ႈတီႈၼႆႉ https://www.blogger.com/ ယဝ်ႉသႂ်ႇၸိုဝ်ႈ G-Mail User Name လႄႈ မၢႆလပ်ႉ Password ႁဝ်းပၼ်၊ သင်ဝႃႈၸဝ်ႈၵဝ်ႇ ပႆႇမီး G-Mail Account သမ်ႉၶဝ်ႈႁဵတ်း Account မႂ်ႇလႆႈတီႈ Create Account ၵႂႃႇၸွမ်းၼင်ႇ ၶၵ်ႉတွၼ်ႈ မၼ်းယွၼ်းမႃးၼၼ်ႉ ၶႃႈတႃႉ။
ပေႃးယဝ်ႉ လိူၵ်ႈၽႃႇသႃႇ တီႈ Language ၸွမ်းၼင်ႇၸဝ်ႈၵဝ်ႇပွင်ၸႂ်သေ သိုပ်ႇၵႂႃႇတီႈ Continue to Blogger သိုပ်ႇၵႂႃႇထႅင်ႈၼႃႈၼိုင်ႈ တီႈ New Blog ၊ တီႈ Title ၼၼ်ႉ တႅမ်ႈသႂ်ႇၸိုဝ်ႈႁူဝ်ၶေႃႈ ဢၼ်ႁဝ်းၶႂ်ႈသႂ်ႇ (ၽႃႇသႃႇသင်ၵေႃႈလႆႈ)၊ တီႈ Address ၼၼ်ႉသမ်ႉ တႅမ်ႈသႂ်ႇၸိုဝ်ႈလိင်ႉၶ် Blog (တူဝ်လိၵ်ႈဢင်းၵိတ်ႉ/ တူဝ်ၼပ်ႉဢင်းၵိတ်ႉ/ တူဝ်ယၢင်ႇ- SaiTaiMao.blogspot.com) ၼင်ႇဢၼ်ႁဝ်းလႆႈၸႂ်၊ သင်ဢွၵ်ႇမၢႆတိုၼ်ႇ(!) ပဵၼ်ႁၢင်ႈသီလိူင်ဝႆႉၸိုင် ပွင်ႇဝႃႈ ၸိုဝ်ႈၼၼ်ႉ မီးၵူၼ်းၸႂ်ႉယဝ်ႉ၊ သင်ဢွၵ်ႇမၢႆထုၵ်ႇ(/) ႁၢင်ႈသီသွမ်ႇၸိုင် ပွင်ႇဝႃႈၸႂ်ႉတိုဝ်းလႆႈ၊ ပေႃးယဝ်ႉ သိုပ်ႇလိူၵ်ႈပိူင်ၾၢင်ၼႃႈ Blog တီႈ Template ၼၼ်ႉသေ သိုပ်ႇၵႂႃႇတီႈ Create Blog! ဢၼ်မီးၽၢႆႇတႂ်ႈသုတ်း ၼၼ်ႉၶႃႈတႃႉ၊ ပေႃးၼၼ် ပွင်ႇဝႃႈၸဝ်ႈၵဝ်ႇ သၢင်ႈ Blog Site လႆႈပဵၼ်ၶွင်သုၼ်ႇတူဝ် ၼၼ်ႉယဝ်ႉ။
သင်ၶႂ်ႈႁူႉဝႃႈ ပိူင်ၾၢင် ၼႃႈတႃ Blog Site ၸဝ်ႈၵဝ်ႇ ဢၼ်သၢင်ႈၶိုၼ်ႈမႃးၼၼ်ႉ ပဵၼ်ၸိူင်ႉႁိုဝ်ၼႆ ၵႂႃႇၼဵၵ်းတူၺ်းလႆႈတီႈ View Blog ဢၼ်မီးၸဵင်ႇၼိူဝ် ၽၢႆႇၶႂႃၼၼ်ႉ လႆႈယူႇယဝ်ႉ။
ၸဝ်ႈၵဝ်ႇသၢင်ႈလႆႈ Blog Site ပဵၼ်ၶွင်သုၼ်ႇတူဝ် ဢၼ်ၼိုင်ႈယဝ်ႉသေတႃႉ ၵူၺ်းၵႃႈ ၼင်ႇႁိုဝ်ၼႃႈတႃပိူင်ၾၢင် Blog Site ႁဝ်းပေႃးတေႁၢင်ႈလီ ထုၵ်ႇၸႂ်ပဵင်းပေႃး တူဝ်ၵဝ်ႇ လႄႈ ၵူၼ်းတၢင်ႇၵေႃႉၼၼ်ႉသမ်ႉ ၶႅၼ်းတေႃႈ ဝႆႉၸႂ်ယိုၼ်းၸႂ်ယၢဝ်းသေ ပႂ်ႉမွင်းလူဢၢၼ်ႇထႅင်ႈ ဝၼ်းတေမႃး သေၵမ်း။
မုင်ႈမွင်း လႄႈ ယုမ်ႇယမ်ဝႃႈ တေပဵၼ်လွင်ႈၵမ်ႉၸွႆႈ ပုၼ်ႈတႃႇ ဢူၺ်းၵေႃႉဢူၺ်းသႄႈ ၸိူဝ်းၶႂ်ႈသၢင်ႈ Blog လႄႈ မီး Site ႁႂ်ႈပဵၼ်ၶွင်သုၼ်ႇတူဝ်ႁင်းၶေႃ ၼၼ်ႉယူႇ မိုတ်ႉၵိုဝ်းၸမ်ၸႂ်သေ ၸၢႆးတႆးမၢဝ်း။
No comments:
Post a Comment