လွင်ႈႁဵတ်းၽိတ်းပိူင်ႈ ၽွင်းႁွမ်းသွင်

2016 Sep 10 : တႅမ်ႈ- ၸၢႆးတႆးမၢဝ်း 

ၵဵဝ်ႇလူၺ်ႈလွင်ႈႁွမ်းသွင်ယိင်းၸၢႆး ၼႆႉသေ ၽူႈၸၢႆးၵေႃႈ ၶႂ်ႈႁႂ်ႈ ၼၢင်းယိင်း ၸဝ်ႈၵဝ်ႇ လႆႈႁပ်ႉလွင်ႈသိူဝ်းသႃႇ ၼင်ႇၶဝ်မိူၼ်ၵၼ်၊ ၵူၺ်းၵႃႈ ၸွမ်းၼင်ႇမီးၵႂၢမ်းဝႃႈဝႆႉ ၵူၼ်းၼႆႉ ဢမ်ႇၵၢင်းလွတ်ႈလႆႈ တၢင်းၽိတ်း ၼႆသေ ၽူႈၸၢႆးၵေႃႉယၢမ်ႈႁွမ်းသွင်မႃး လၢႆပွၵ်ႈလၢႆၵမ်းၼၼ်ႉၵေႃႈ ၸၢင်ႈမေႃႁဵတ်းၽိတ်း ယူႇၼိုင်ႈပွၵ်ႈ သွင်ၵမ်း မိူၼ်ၵၼ်။

ယွၼ်ႉၼၼ် ၸဝ်ႈပၢႆးပၺ်ႇၺႃႇ လဵပ်ႈႁဵၼ်းၽၢႆႇ ႁွမ်းသွင် လႄႈ ၽူႈၶူၼ်ႉၶႂႃႉ ၶဝ်ၵေႃႈ လၢတ်ႈဝႃႈ ၽူႈၸၢႆးၵမ်ႈၼမ်ၼမ် ၼႆႉ ထၢင်ႇတူဝ်ၶဝ်ၵတ်ႉၶႅၼ်ႇ လူင်ႉလႅၼ်ႇ လွင်ႈႁွမ်းသွင်ၼႆ ႁင်းၽႂ်မၼ်းယူႇသေတႃႉ ၵူၺ်းၵႃႈ ၸွမ်းၼင်ႇတူဝ်ၶဝ်ထၢင်ႇဝႆႉၼၼ်ႉၵူၺ်းတႄႉ ဢမ်ႇပႆႇတဵမ်ထူၼ်ႈလႆႈ လူးၵွၼ်ႇ ၼႆယဝ်ႉ။

တီႈတေႉမၼ်း သင်ၽူႈၸၢႆး မႄးလႅၵ်ႈလၢႆႈ မူၼ်ႉမႄး တၢင်းထၢင်ႇၽိတ်းတူဝ်ၵဝ်ႇ ၼၼ်ႉ ဢိတ်းဢွတ်းၵူၺ်းၵေႃႈ ၵၢၼ်ႁွမ်းသွင်ၼၼ်ႉ တေလီၶိုၼ်ႈမႃးၼင်ႇၸႂ်လႆႈယူႇ၊ ၶေႃႈဢၼ်ၸဝ်ႈၵဝ်ႇ ယၢမ်ႈၽိတ်းလႄႈ တေလႆႈမႄးလႅၵ်ႈလၢႆႈၸိူင်ႉႁိုဝ်ၼႆၼၼ်ႉ ႁဝ်းမႃးလဵပ်ႈႁဵၼ်းၸွမ်းၵၼ်။

1)ႁွတ်ႈထိုင်တီႈၼွၼ်းယဝ်ႉ ၸင်ႇတႄႇလွင်ႈႁွမ်းသွင်

- တႃႇႁႂ်ႈၽူႈၸၢႆး ဢွၵ်ႇလူမ်းၶႂ်ႈႁွမ်းသွင်ၼၼ်ႉ မိူၼ်ၵၼ်တင်းႁဝ်း ၼဵၵ်းၼဵၼ် ပိုတ်ႇၾႆးၵူၺ်း၊ ၵူၺ်းၵႃႈ တႃႇႁႂ်ႈၼၢင်းယိင်း မီးလူမ်းၼၼ်ႉသမ်ႉ လူဝ်ႇလႆႈၸႂ်ႉၶၢဝ်းယၢမ်း လႄႈ လွင်ႈၼႆႉ ၸဝ်ႈပၢႆးယူတ်းယႃ လွင်ႈႁွမ်းသွင် ၶဝ်ဝႃႈ ထုၵ်ႇလႆႈ ၵွတ်ႇ ၸုပ်ႇ ၼူမ် ယိပ်းမိုဝ်းပၼ်ၶဝ် ၸဵမ်ၵႂႃႇႁဵတ်းၼႄ လွင်ႈပႅင်းႁၵ်ႉပၼ်ၶဝ် ဢၼ်တေႁဵတ်းႁႂ်ႈၼၢင်းယိင်းၸဝ်ႈၵဝ်ႇ လႆႈၸႂ်ၸပ်းပႅင်း ဢွၼ်တၢင်းယဝ်ႉ ၸင်ႇတႄႇလွင်ႈႁွမ်းသွင်ၼႆ လီသုတ်း။

- လိူဝ်ၼၼ်ႉဢမ်ႇၵႃး လွင်ႈၵပ်းသိုပ်ႇၵၼ် ၼိုင်ႈဢၼ်ၼႆႉ သင်ဝူၼ်ႉဝႃႈ မီးလွင်ႈႁူမ်ႇလူမ်ႈဢုၼ်ႇၸႂ် လီယဝ်ႉၼႆၵွၼ်ႇ ယူႇတီႈၼၢင်းယိင်း ၼိုင်ႈၵေႃႉ ၸင်ႇတေၸၢင်ႈၶႂ်ႈၶဝ်ႈမႃး မူၼ်ႈသိူဝ်းၸွမ်း ၼႂ်းၵၢၼ်ႁွမ်းသွင်လႄႈ  ၶေႃႈၼႆႉ ပဵၼ်ၵၢၵ်ႇသေႃးလမ်ႇလွင်ႈ ပိူင်ႈၼိုင်ႈ ၵမ်းသိုဝ်ႈယဝ်ႉ၊ သင်ၵွတ်ႇပၼ်ၶဝ်ႁိုင်ႁိုင်ၸိုင် ယိုင်ႈၶႅၼ်းတေႁဵတ်းႁႂ်ႈ ဢၼ်ၸဝ်ႈၵဝ်ႇထၢင်ႇဝႆႉၼၼ်ႉ ၸဵဝ်းထိုင်တီႈယွတ်ႈလူးၵွၼ်ႇ၊ သင်ၵွတ်ႇပၼ် 30-သိၵ်ႉ (ၸႅၵ်ႉၵၢၼ်ႉ) ၸိုင် မိူၼ်တင်းႁဝ်း သၢင်ႈလွင်ႈၵပ်းသိုပ်ႇ လႄႈ လွင်ႈယုမ်ႇယမ်ၸႂ် ပၼ်ႁႂ်ႈၸိူဝ်ႉ Oxytocin ၼၢင်းယိင်းၶဝ် တိုၼ်ႇသၢၼ်ႈၶိုၼ်ႈမႃး ၼၼ်ႉယဝ်ႉ။

2)ထၢင်ႇဝႃႈၸဝ်ႈၵဝ်ႇႁူႉ လွင်ႈၼၢင်းယိင်းၶဝ် ၶႂ်ႈလႆႈၸိူင်ႉႁိုဝ်

- ၵၢပ်ႈပၢၼ်ယၢဝ်းလဵဝ်ၼႆႉၵေႃႈ ၼၢင်းယိင်းၵမ်ႈၼမ်ၶဝ် မိူၼ်ၵၼ်တင်း ပၢၼ်မိူဝ်ႈပူၼ်ႉမႃး (20-30) ပီႊ ၼၼ်ႉၵူၺ်းၼင်ႇၵဝ်ႇ ၽွင်းႁွမ်းသွင်ၵၼ်ယဝ်ႉၼၼ်ႉ တိုၵ်ႉမီးလွင်ႈႁဵတ်းၵဵင်ႈ မိူၼ်ၼင်ႇလႆႈႁပ်ႉ ၸုတ်ႇသုတ်းယွတ်ႈဝႆႉ၊ ၵူၺ်းၵႃႈ ၶဝ်ဢမ်ႇလႆႈမီးလွင်ႈ ႁၢၼ်ႉၸႂ်ပဵင်းပေႃး ထိုင်တီႈဢၼ်ဝႃႈၼၼ်ႉ ႁဝ်းပဵၼ်ၽူႈၸၢႆးၵေႃႉၼိုင်ႈ ထုၵ်ႇလီၶိုပ်ႈႁူႉဝႆႉယူႇ။

- ပေႃးၼၼ် ၼၢင်းယိင်းၶဝ် သမ်ႉတေလႆႈႁပ်ႉၸေးၸိမ်ႇၸိူင်ႉႁိုဝ် လႄႈ ၶႂ်ႈလူဝ်ႇၸိူင်ႉႁိုဝ် သင်မီးၵႂၢမ်းထၢမ်ၶိုၼ်ႈမႃးၸိူင်ႉၼႆ ႁဝ်းၽူႈၸၢႆးဢမ်ႇထုၵ်ႇလႆႈၵူဝ်၊ ထုၵ်ႇလႆႈႁူႉဝႃႈ ပေႃးထၢမ်မႃးၸိူင်ႉၼၼ် ၸဝ်ႈၵဝ်ႇတေလႆႈၶိုင်ၸိူင်ႉႁိုဝ် ၼႆၼၼ်ႉၵူၺ်း။

3)လွင်ႈယိပ်းၵမ် ပၢႆးဝူၼ်ႉၸဝ်ႈၵဝ်ႇဝႆႉ ပဵၼ်ပိူင်တၢႆ

- ၸဝ်ႈၵဝ်ႇႁဵတ်းၶႅမ်ႉလႅပ်ႈဝႆႉ ပွၵ်ႈၼိုင်ႈသွင်ၵမ်း သေတႃႉၵေႃႈ ယႃႇၵိူဝ်းထၢင်ႇဝႃႈ မိူဝ်းၼႃႈဝၢႆးလိုၼ်းမႃးၵေႃႈ တေၶႅမ်ႈလႅပ်ႈလႆႈမိူၼ်ၼၼ်ထႅင်ႈ ၵူႈပွၵ်ႈၵူႈၵမ်း၊ လွင်ႈဢၼ်လႂ် တေႁဵတ်းႁႂ်ႈ ၵၢင်ၸႂ်ၼၢင်းယိင်း ၼိုင်ႈၵေႃႈ ပူၵ်းတိုၼ်ႇသၢၼ်ႈၶိုၼ်ႈမႃး လႆႈၼႆၼၼ်ႉ မၼ်းဢိင်ၼိူဝ် ၸေးၸိမ်ႇၶဝ်မီးၼၼ်ႉၵူၺ်း၊ ဢၼ်ၼႆႉ မၼ်းၵဵဝ်ႇၶႂၢင်ႈတင်း ႁူဝ်လိူၼ်ၶဝ် ဢမ်ႇၵႃး ၵဵဝ်ႇတင်းႁူဝ်ၼူမ်း(တိမ်ႇၼူမ်း) ၶဝ်ပႃးယဝ်ႉ၊ ယွၼ်ႉဝႃႈ ႁူဝ်ၼူမ်းၶဝ်ၼႆႉ ၶၢမ်ႇၸေးၸိမ်ႇလႆႈဝႆးငၢႆႈ ဢွၼ်တၢင်း ဢင်ႇၵႃႇၶွင်ၶဝ် ၼၼ်ႉယဝ်ႉ။

- ယွၼ်ႉပိူဝ်ႈၼၼ် ထုၵ်ႇလႆႈပႃးၸႂ်လဵပ်ႈႁဵၼ်း တီႈၼိူဝ်ၼၢင်းယိင်းၸဝ်ႈၵဝ်ႇ လီလီ လႄႈ ၶတ်းၸႂ်ၵူႈလၢႆးလၢႆးယဝ်ႉ ထတ်းတူၺ်းလွင်ႈဝႃႈ ၶဝ်တုမ်ႉတွပ်ႇမႃးၶိုၼ်းၸိူင်ႉႁိုဝ်၊ မိူဝ်ႈၽွင်းၼၢင်းယိင်းၶဝ် တိုၵ်ႉတႄႇမီးလူမ်း တိုၼ်ႇသၢၼ်ႈ ၶႂ်ႈႁၢၼ်ႉၸႂ်မႃးၼၼ်ႉ ၵမ်ႈၼမ် ၵႆႉႁၼ် ၵူၼ်းၸၢႆးမီးလွင်ႈလႅၵ်ႈလၢႆႈ ၵႂႃႇပႅတ်ႈလႄႈ ၸၢင်ႈႁဵတ်းႁႂ်ႈ လွင်ႈႁၢၼ်ႉၸႂ်ၼၢင်းယိင်းၶဝ် ႁၢႆလၢႆၵႂႃႇပႅတ်ႈလႆႈ ၼၼ်ႉယဝ်ႉ။

4)ဢဝ်ၸႂ်သႂ်ႇၼိူဝ် ၾၢင်ႁၢင်ႈ

- ထုၵ်ႇလႆႈတိူဝ်းၶႂၢၵ်ႈ တၢင်းဝူၼ်ႉၸဝ်ႈၵဝ်ႇ ႁႂ်ႈမေႃတိုၼ်ႇသၢၼ်ႈဝႆႉထႃႈ လူင်ႈၼႃႈ၊ ၵူၼ်ႈၸၢႆးၵမ်ႈၽွင်ႈၼႆႉ ၵႆႉဢဝ်ၸႂ်သႂ်ႇ ၼိူဝ်လွင်ႈတိုၼ်ႇသၢၼ်ႈ ၾၢင်ႁၢင်ႈသေ လိုမ်းပႅတ်ႈ လွင်ႈတိုၼ်ႇသၢၼ်ႈ ပၢႆးၸႂ် ယူႇယဝ်ႉ။

5)ထၢင်ႇဝႃႈ ၼၢင်းယိင်းလႆႈႁပ်ႉ ၸုတ်ႇသုတ်းယွတ်ႈ ၽွင်းႁွမ်းသွင်ပိူင်လဵဝ်

- ထုၵ်ႇလီႁူႉဝႆႉဝႃႈ ၼၢင်းယိင်းၼႂ်းႁူဝ်ပၢၵ်ႇပႅတ်ႇသိပ်း (80%) ၼႆႉ ဢမ်ႇၸႂ်ႈဝႃႈ ႁွမ်းသွင်ပိူင်လဵဝ် ၵူၺ်းသေ လႆႈႁပ်ႉ ၸုတ်ႇသုတ်းယွတ်ႈ၊ ယွၼ်ႉပိူဝ်ႈလွၵ်းလၢႆး ၵၢၼ်ႁွမ်းသွင်ၵမ်ႈၼမ်ၼမ် ၼႆႉ ဢမ်ႇၸၢင်ႈပူၵ်းတိုၼ်ႇသၢၼ်ႈပၼ် တိမ်ႇ Clitoris ၼၢင်းယိင်း လႆႈၼၼ်ႉယဝ်ႉ၊ ယူႇတီႈၵၢင်ၸႂ် ၼၢင်းယိင်းၶဝ်တႄႉ သင်ၸႂ်ႉလိၼ်ႉ (Oral Sex) သေ တိုၼ်ႇသၢၼ်ႈပၼ်ၶဝ်ၸိုင် ယိုင်ႈၶႅၼ်းတေႁဵတ်းႁႂ်ႈၶဝ် လႆႈႁပ်ႉၸုတ်ႇသုတ်းယွတ်ႈ ထိုင်တီႈပဵင်းပေႃး လိူဝ်သေ ႁွမ်းသွင်ၵၼ်လူးၵွၼ်ႇယဝ်ႉ၊ လိူဝ်ၼၼ်ႉ ထုၵ်ႇလႆႈၶတ်းၸႂ် ၸႂ်ႉႁႂ်ႈၼၢင်းယိင်း ယူႇၽၢႆႇၼိူဝ်သေ ႁွမ်းသွင်ပၼ် ယူႇယဝ်ႉ။

6)ဝႆႉတုမ်ႇ Clitoris ပဵၼ်ပိူင်ယႂ်ႇႁႅင်းပူၼ်ႉ

- လွင်ႈဝႃႈ တႃႇႁႂ်ႈၼၢင်းယိင်း လႆႈႁပ်ႉၸေးၸိမ်ႇ ၸုတ်ႇသုတ်းယွတ်ႈၼၼ်ႉ ထုၵ်ႇလႆႈတိုၼ်ႇသၢၼ်ႈပၼ် တိမ်ႇ Clitoris ၼႆ ထုၵ်ႇမႅၼ်ႈယူႇသေတႃႉ ၵူၺ်းၵႃႈ ဢၼ်ၸဝ်ႈၵဝ်ႇထၢင်ႇၼႆႉ ယိုင်ႈၶႅၼ်းတေႁဵတ်းႁႂ်ႈ သုၵ်ႉယုင်ႈ လိူဝ်ႁႅင်းၵွၼ်ႇယဝ်ႉ။

- ၵူၼ်းၸၢႆး မၢင်ၵေႃႉၼႆႉ ယွၼ်ႉဢမ်ႇပွင်ႇၸႂ် ၼိူဝ်ပိူင်ၵေႃႇတင်ႈ တိမ်ႇ Clitoris ၼၼ်ႉယဝ်ႉ၊ ၵူၺ်းၵႃႈဝႃႈ ဢၼ်ၼႆႉ ယႂ်ႇလိူဝ်သေ ဢၼ်မၢၵ်ႇတႃမုင်ႈႁၼ်လႆႈ တုမ်ႇလဵၵ်ႉလဵၵ်ႉ ၼၼ်ႉၵွၼ်ႇ၊ သၢႆဢႃႇယူင်ႇ ဢၼ်လုၵ်ႉတီႈ Clitoris သေၵႂႃႇၼၼ်ႉ တေၽႄႈၵႂႃႇၸွမ်း ၼႂ်းသဵၼ်ႈဢင်ႇၵႃႇ ၼၢင်းယိင်း ၼႂ်းသဵၼ်ႈၵိူတ်ႇ ဢၼ်ပဵၼ် သဵၼ်ႈႁွမ်းသွင် ၼၼ်ႉယဝ်ႉ၊ ဢွင်ႈတီႈၼႆႉၵေႃႈ ပဵၼ်ဢွင်ႈဢၼ်ပၼ်ၸေးၸိမ်ႇ ဢၼ်ၼိုင်ႈယူႇယဝ်ႉ။

- သင်ဝႆႉတိမ်ႇ Clitoris ဢၼ်မီးၽၢႆႇၼိူဝ် ႁူးသဵၼ်ႈၵိူတ်ႇ ၼၼ်ႉ ပဵၼ်ပိူင်ယႂ်ႇႁႅင်းပူၼ်ႉတီႈ ၼႃႇၼႅၼ်ႇၵေႃႈ တေႁဵတ်းႁႂ်ႈလွင်ႈသိူဝ်းသႃႇ ၼၢင်းယိင်းၶဝ် ႁၢႆၵႂႃႇပႅတ်ႈလႆႈ၊ ယွၼ်ႉပိူဝ်ႈသင်ဢၼ်ဝႃႈၼၼ်ႉ ယွၼ်ႉဝႃႈဢႃႇယူင်ႇၶဝ် လႆႈၶၢမ်ႇႁႅင်းပႅတ်ႈပူၼ်ႉလႄႈ သင်ႁဵတ်းပၼ်ၶဝ် ႁႅင်းၼႃႇၸိုင် တေလႅၵ်ႈလၢႆႈ ၵႂႃႇပဵၼ်လွင်ႈၸဵပ်း ၼၼ်ႉယဝ်ႉ။

ၶေႃႈတိုၼ်း - webmd.com

ဢိင်တီႈ - Irrawaddy.com