လၢႆးၸဵဝ်းၸပ်းသၼ်ႇထေႇ တႃႇၽူႈၸိူဝ်းၶႂ်ႈလႆႈလုၵ်ႈလၢင်းဝႆး

ၵူႈ(ၽူဝ်မေး)ၸိူဝ်းတႄႇၼႃႈႁိူၼ်းယဝ်ႉၼၼ်ႉ ၽႂ်ၽႂ်ၵေႃႈဢွၼ်ၵၼ် ၸႂ်တိုၼ်ႇတဵၼ်ႈ မီးလွင်ႈႁၢင်ႈႁႅၼ်း တႅပ်းတတ်းသဵၼ်ႈၸႂ် ၶႂ်ႈပဵၼ် ပေႃႈမႄႈလုၵ်ႈဢွၼ်ႇ ဝႆးဝႆးယူႇႁင်းၽႂ်မၼ်း၊ ၵမ်ႈၽွင်ႈ ၶတ်းၸႂ်ၼိုင်ႈပွၵ်ႈသွင်ပွၵ်ႈသေ ၸပ်းသၼ်ႇထေႇလႆႈ၊ ၵူၺ်းၵႃႈ ၵမ်ႈၽွင်ႈသမ်ႉ ၶတ်းၸႂ်လၢႆလိူၼ်ၵေႃႈ ဢမ်ႇၸပ်း၊ လွင်ႈၼႆႉယွၼ်ႉဝႃႈ မီးၶေႃႈႁႄႉႁၢမ်ႈသဵၼ်ႈတၢင်း တႃႇႁႂ်ႈၼၢင်းယိင်းၼိုင်ႈၵေႃႉ ဢမ်ႇၸပ်းလႆႈသထေႇ ၼၼ်ႉယဝ်ႉ။

ပေႃးၼၼ် ႁဝ်းမႃးလဵပ်ႈႁဵၼ်း ႁႃလၢႆးတႃႇၸၢင်ႈႁဵတ်းႁႂ်ႈ ၼၢင်းယိင်းၼိုင်ႈၵေႃႉ ၸဵဝ်းၸပ်းသထေႇလႆႈ ၵၼ်ၼေႃႈ၊ ဢၼ်ၼႆႉတႄႉ မိူဝ်ႈၽွင်းႁွမ်းသွင်ၼၼ်ႉ လူဝ်ႇလႆႈမႅၼ်ႈယမ်ႈၶၢဝ်းယၢမ်းမၼ်း၊ ၵွပ်ႈဝႃႈ ၵူႈၸိူဝ်းၶႂ်ႈလႆႈလုၵ်ႈလၢင်းသေ သမ်ႉဢမ်ႇလႆႈၼၼ်ႉ ပဵၼ်ယွၼ်ႉၵၢၼ်ႁွမ်းသွင်ၶဝ် ဢမ်ႇမႅၼ်ႈယမ်ႈၸွမ်း ၶၢဝ်းယၢမ်း တီႈၼႂ်းလိူၼ် ၼိုင်ႈလိူၼ်ၼၼ်ႉယဝ်ႉ။

ယူႇတီႈၼၢင်းယိင်း ၼိုင်ႈၵေႃႉသေ 

လူဝ်ႇလႆႈႁူႉဝႃႈ ၼႂ်းၼိုင်ႈလိူၼ်ၼၼ်ႉ ၸိူဝ်ႉၶႆႇ(Ovum) ၸဝ်ႈၵဝ်ႇ တူၵ်းလႆႈၼႂ်းဝၼ်းလႂ်၊ တူဝ်ယၢင်ႇမၼ်း- ၸွမ်းၼင်ႇ ၾိင်ႈရႃႇသီႇ ၼၢင်းယိင်းမီးၼၼ်ႉ ၸၢင်ႈတူၵ်းလႆႈ ၼႂ်းၵၢင်လိူၼ်၊ သင်လုၵ်ႉတီႈ ဝၼ်းရႃႇသီႇမႃး (ႁူဝ်လိူၼ်မႃး/ ဝၼ်းလိူတ်ႈတူၵ်း)သေ တႄႇၼပ်ႉဢၢၼ်ႇၵႂႃႇၸိုင် တေပဵၼ်ၼႂ်း 14-ဝၼ်းႁိမ်းႁွမ်း ၸိူဝ်းၼႆႉယူႇ၊ သင်ၶတ်းၸႂ်ႁွမ်းသွင် ၼႂ်းဝၼ်းၸိူဝ်ႉၶႆႇတူၵ်းၼႆၸိုင် ၸၢင်ႈမီးပိူဝ်းသႅၼ်း(%) ၸပ်းသၼ်ႇထေႇလႆႈ ၼမ်လိူဝ်သုတ်း၊ မိူဝ်ႈႁွမ်းသွင်ယဝ်ႉၼၼ်ႉ ၼွၼ်းတၢၵ်ႇႁၢႆသေ ၶိုၼ်းဢဝ်မွၼ်ႁူဝ် လွင်ဝႆႉတီႈၵုမ်ႇၵူၼ်ႈ ႁႂ်ႈတိၼ်လႆႈယုၵ်ႉဝႆႉ ႁိုင်မွၵ်ႈ 15-မဵတ်ႉ(မိၼိတ်ႈ) တႃႇႁႂ်ႈၼမ်ႉၸိူဝ်ႉ(Sperm) ၵူၼ်းၸၢႆး ၶဝ်ႈၵႂႃႇၼႂ်းႁူင်းလုၵ်ႈဢွၼ်ႇ (Ovary)ၼၼ်ႉ ၼမ်ၼမ်တႃႉ (ၼႆႉပဵၼ်ၶၵ်ႉတွၼ်ႈလမ်ႇလွင်ႈသုတ်း)။

သင်ၶႂ်ႈႁူႉဝႃႈ ဝၼ်းလမ်ႇလွင်ႈလူင်ၼႆႉ ပဵၼ်ဝၼ်းလႂ်တေႉတေႉ ၼႆၸိုင် တေလႆႈၵမ်းတူၺ်း (တႅၵ်ႈတူၺ်း) လူမ်းမႆႈတီႈတူဝ်၊ ၵွပ်ႈဝႃႈ ဝၼ်းၸိူဝ်ႉၶႆႇတူၵ်းၼၼ်ႉ ယွၼ်ႉႁေႃႇမူၼ်း(Hormones)သေ ႁဵတ်းႁႂ်ႈလူမ်းမႆႈတီႈတူဝ် ၶိုၼ်ႈသုင်လိူဝ်ၵူႈဝၼ်း၊ ၵွပ်ႈၼၼ် ထုၵ်ႇလီၵမ်းတူၺ်း မိူဝ်ႈတိုၵ်ႉလုၵ်ႉမႃးၸဝ်ႉၸဝ်ႉၼၼ်ႉယူႇ၊ သင်ၶႂ်ႈႁႂ်ႈမၼ်း တႅတ်ႈတေႃးလီၸိုင် ထုၵ်ႇလီလႆႈၵႂႃႇၸႅတ်ႈႁေႃႇမူၼ်း ဢၼ်ႁွင်ႉ LH Surge ဢၼ်ပဵၼ် LH ပႃးၼႂ်းၼမ်ႉယဵဝ်ႈၼမ်ႉၶီႈ လူၺ်ႈၵႂႃႇဢုပ်ႇဢူဝ်း တီႈမေႃယႃၶဝ်ၼၼ်ႉယဝ်ႉ။

ႁၢင်ႈ - ပႆႇလႆႈၸၢမ်း

ယွမ်းယွၼ်ႇၼမ်ႉၼၵ်းတူဝ်ၵဝ်ႇသေ ၵိၼ်တၢင်းၵိၼ်ပၼ် ႁႂ်ႈၽဵင်ႇပဵင်း

မေႃယႃၽၢႆႇၵိူတ်ႇလုၵ်ႈဢွၼ်ႇ ၶဝ်ဝႃႈ ၼၢင်းယိင်းၸိူဝ်းပီးသေ မီးၼမ်ႉၼၵ်းတူဝ်သုင်ႁႅင်း လႄႈ ၼၢင်းယိင်းၸိူဝ်းယွမ်သေ မီးၼပ်ႉၼၵ်းတူဝ်တႅမ်ႇႁႅင်းၶဝ်ၼၼ်ႉ မီးပိူဝ်းသႅၼ်း(%) ၸပ်းလုၵ်ႈယၢပ်ႇၼႆယဝ်ႉ၊ ယွၼ်ႉပိူဝ်ႈဝႃႈ ၵၢၼ်မီးၼပ်ႉၼၵ်းတူဝ် သုင်ႁႅင်း လႄႈ တႅမ်ႇႁႅင်းၼႆႉ ၸၢင်ႈပဵၼ် ၵၢၼ်ၵိတ်ႇၶႂၢင်သုၵ်ႉယုင်ႈတေႃႇ လွင်ႈၸိူဝ်ႉၶႆႇတူၵ်းလႄႈ ႁဵတ်းႁႂ်ႈရႃႇသီႇ ဢမ်ႇတူၵ်းမႅၼ်ႈၶၢဝ်းယၢမ်းၼၼ်ႉယဝ်ႉ။

ၼမ်ႉၼၵ်းတူဝ် ဢၼ်ထုၵ်ႇလီမီးၼၼ်ႉ ပဵၼ်ၼႂ်းၵႄႈ 18.5 တေႃႇထိုင် 24.9 (Body Mass Index - BMI)၊ ၼင်ႇႁိုဝ်ၼမ်ႉၼၵ်းတူဝ် ပေႃးတေမီးၼႂ်းၵႄႈၼၼ်ႉ ထုၵ်ႇလီလႆႈလဵၼ်ႈဢဵၼ်ႁႅင်းသေယဝ်ႉ ၵိၼ်တၢင်းၵိၼ်ပၼ် ႁႂ်ႈၽဵင်ႇပဵင်း၊ ၵေႃႉတေပဵၼ် ပေႃႈလုၵ်ႈဢွၼ်ႇ လႄႈ မႄႈလုၵ်ႈဢွၼ်ႇၼၼ်ႉ ထုၵ်ႇလီလႆႈၵိၼ်ပၼ် တၢင်းၵိၼ်ဢၼ်ပႃး ထၢတ်ႈဝီႇတမိၼ်ႇ လႄႈ ထၢတ်ႈသတ်ႉတု (Vitamins and Minerals) ၼၼ်ႉၼမ်ၼမ်သေ သင်ၸမ်ပဵၼ်ၸိုင် ၵိၼ်ပၼ်ယႃႁႅင်းတႃႉ။

ယွမ်းယွၼ်ႇၵၢၼ်ၵိၼ် ထၢတ်ႈၵၽိၼ်း (Caffeine)

သင်ၵိၼ်ထၢတ်ႈၵၽိၼ်း ၼမ်ပူၼ်ႉတီႈၸိုင် ၸၢင်ႈႁဵတ်းႁႂ်ႈတူဝ်ၶိင်း ဢၼ်ႁဵတ်းၵၢၼ်ၸုပ်ႇထၢတ်ႈလဵၵ်း ဢႄႇလူင်းသေ မီးပၼ်ႁႃတေႃႇ ၵၢၼ်ၸပ်းသၼ်ႇထေႇ လႆႈႁၢႆႉႁႅင်း၊ ယွၼ်ႉၼၼ် ၸဵမ်ၵူၼ်းၸၢႆးလႄႈၼၢင်းယိင်း ထုၵ်ႇလီလႆႈဝႄႈၵၢၼ်ၵိၼ် ၵႃႇၽီႇ၊ ၼမ်ႉၼဵင်ႈ၊ ၼမ်ႉၶူၵ်ႉ ဢၼ်မီး SODA ၸဵမ်ၵႂႃႇဢၼ်ပႃးထၢတ်ႈၵၽိၼ်း ၼၼ်ႉယူႇ၊ ဝႄႈၸိူဝ်းၼႆႉသေ ထုၵ်ႇလီၶိုၼ်းၵိၼ်ပၼ် ၼမ်ႉၼူမ်း လႄႈ ၼူမ်းသူမ်ႈ ဢၼ်မီး ထၢတ်ႈၶႄႇလ်သီယမ်ႇ (Calcium) ပိူဝ်ႈႁႂ်ႈပဵၼ်လွင်ႈၵမ်ႉၸွႆႈ ၵၢၼ်ၸပ်းသၼ်ႇထေႇၼၼ်ႉတႃႉ။

ႁၢင်ႈ - ၸပ်းသၼ်ႇထေႇ

ငိူင်ႉဝႄႈၵၢၼ်ၸႂ်ႉတိုဝ်း လႅၼ်းယႃႈ၊ လဝ်ႈ လႄႈ ယႃႈမဝ်းၵမ်

ယွၼ်ႉဝႃႈၶေႃႈၼႆႉ ပဵၼ်ၵၢၼ်ႁႄႉတတ်းပႅတ်ႈ တႃႇၸပ်းလႆႈသၼ်ႇထေႇသေယဝ်ႉ ၸၢင်ႈႁဵတ်းႁႂ်ႈ သထေႇတူၵ်း၊ ၵိူတ်ႇလုၵ်ႈဢမ်ႇမီးသၢႆၸႂ်၊ ဢမ်ႇတၼ်းၸေးလိူၼ်သေၵိူတ်ႇ လႄႈ ၵိူတ်ႇလုၵ်ႈဢင်ႇၵႃႇဢမ်ႇတဵမ်ထူၼ်ႈ  ၸိူဝ်းၼႆႉလႆႈ၊ သင်လုတ်ႇလႅၼ်းယႃႈၸိုင် ၸၢင်ႈႁဵတ်းႁႂ်ႈ ၼမ်ႉၸိူဝ်ႉၵူၼ်းၸၢႆး ဢူၼ်ႈဢွၼ်ႇဢႄႇယွမ်း ဢမ်ႇၵႃး ၸၢင်ႈၵႂႃႇတုမ်ႉတိူဝ်ႉသႂ်ႇပႃး ႁႅင်းပဵၼ်လႆႈၸိူဝ်ႉၽၼ်း (Fertilization) တီႈၼၢင်းယိင်း ၼၼ်ႉယဝ်ႉ။

ၼွၵ်ႈသေၼၼ်ႉ ၵၢၼ်လုတ်ႇလႅၼ်းယႃႈၼႆႉ ၸၢင်ႈၵႂႃႇႁႄႉတတ်းပႅတ်ႈ လွင်ႈၸုပ်ႇဢဝ် ထၢတ်ႈၸိၼ်ႉလႄႈ ထၢတ်ႈဝီႇတမိၼ်ႇ (Zinc and Vitamins) ဢၼ်ပဵၼ်ထၢတ်ႈလမ်ႇလွင်ႈ ၶွင်ဢႃႇႁႃႇရ သေဢမ်ႇၵႃး ၸၢင်ႈႁဵတ်းႁႂ်ႈ ၼႂ်းလိူတ်ႈ မီးလႆႈထၢတ်ႈၵွင်ႉ ၵၢတ်ႉၶရူဝ်ႇမီႇယမ်ႇ လႄႈ ၵွၼ်ႈၶႆ (Card Chromium and Lead) ၼမ်ၶိုၼ်ႈ၊ ၸွမ်းၼင်ႇၽူႈၶူၼ်ႉၶႂႃႉၶဝ် ၶူၼ်ႉၶႂႃႉႁၼ်ၼၼ်ႉ ၼႂ်းၼိုင်ႈဝူင်ႈၸဵတ်းဝၼ်းလႂ် ၼၢင်းယိင်း ဢၼ်ၵိၼ်လဝ်ႈယွမ်း 5-ယူႇၼိတ်ႉသ်(Units)ၼႆႉ ဝၢႆးႁိုင်ႁူၵ်းလိူၼ်ယဝ်ႉ ၸၢင်ႈမီးပိူဝ်းသႅၼ်း(%) ၸပ်းသထေႇလႆႈ ၼမ်လိူဝ်သေ ၼၢင်းယိင်း ၸိူဝ်းၵိၼ်လဝ်ႈပူၼ်ႉ10-ယူႇၼိတ်ႉသ် တႃႇသွင်ပုၼ်ႈၼႆယဝ်ႉ။

ၵိၼ်ပၼ် ၽူဝ်းလိၵ်ႉ ဢႅၵ်ႉသိတ်ႉ (Folic Acid) တႃႉ

ၽူဝ်းလိၵ်ႉ ဢႅၵ်ႉသိတ်ႉ ၼႆႉယွၼ်ႉဝႃႈ ၸၢင်ႈႁႄႉၵင်ႈပၼ်လႆႈ ဢၼ်တေၸၢင်ႈတုမ်ႉယွၼ်ႈတေႃႇ သဵၼ်ႈဢႃႇယူင်ႇ လႄႈ ဢွၵ်းဢေႃ လုၵ်ႈဢွၼ်ႇ ဢၼ်တေၵိူတ်ႇပႃးၸွမ်းမႃး ၼႂ်းသထေႇၼၼ်ႉလႄႈ ထုၵ်ႇလီလႆႈၵိၼ်ပၼ် ၽူဝ်းလိၵ်ႉ ဢႅၵ်ႉသိတ်ႉ ၼႆႉယူႇ၊ လုၵ်ႉတီႈတၢင်းၵိၼ်သေ တႃႇတေလႆႈ ၽူဝ်းလိၵ်ႉ ဢႅၵ်ႉသိတ်ႉ ၼၼ်ႉဢမ်ႇငၢႆႈလႄႈ ယွၼ်ႉၼၼ် ထုၵ်ႇလီၵိၼ်ပၼ်ယႃႈႁႅင်း ၽူဝ်းလိၵ်ႉ ဢႅၵ်ႉသိတ်ႉ ယူႇယဝ်ႉ။

ႁၢင်ႈ - ၸပ်းသၼ်ႇထေႇ

ယွမ်းယွၼ်ႇ လွင်ႈတဵၵ်းတဵင်ၸႂ်လႄႈ

သင်ဝႃႈၼၢင်းယိင်း လႆႈႁပ်ႉလွင်ႈတဵၵ်းတဵင်ၸႂ် ၼႆၸိုင် ၸၢင်ႈၵိူတ်ႇဢွၵ်ႇပၼ် ႁေႃႇမူၼ်း ဢၼ်ပဵၼ် Prolactin ၼၼ်ႉၼမ်ႁႅင်းပူၼ်ႉသေယဝ်ႉ ၸၢင်ႈၵႂႃႇပဵၼ် လွင်ႈၵိတ်ႇၶႂၢင်သုၵ်ႉယုင်ႈတေႃႇ ၸိူဝ်ႉၶႆႇတူၵ်းလႆႈလႄႈ တႃႇၸပ်းသၼ်ႇထေႇလႆႈၼၼ်ႉၵေႃႈ ပိူဝ်းသႅၼ်း(%)မၼ်းဢႄႇ၊ ၼွၵ်ႈသေၼၼ်ႉ ယွၼ်ႉၵူၼ်းၵေႃႉလႆႈႁပ်ႉ လွင်ႈတဵၵ်းတဵင်ၸႂ်ၼႆႉ လႆႈဢဝ်ဢဵၼ်ႁႅင်းမၼ်း ၵႂႃႇၸႂ်ႉတိုဝ်းတီႈ လွင်ႈၵုမ်းထိင်း လႄႈ လွင်ႈလႅၵ်ႈလၢႆႈ ၼႂ်းလွၵ်းပိူင်တူဝ်ၶိင်းမၼ်း ၼမ်ၼႃႇပူၼ်ႉၼၼ်ႉယဝ်ႉ၊ သင်ၶႂ်ႈလႆႈလုၵ်ႈလၢင်းၸိုင် ၸဵမ်ၵူၼ်းၸၢႆးလႄႈ ၼၢင်းယိင်း တင်းသွင်ၽူဝ်ၽေး ထုၵ်ႇလီလႆႈ ယွမ်းႁဵတ်းၵၢၼ်သေ လဵၼ်ႈယေႃးၵ(YOGA) ႁဵတ်းလွင်ႈလိုဝ်ႈႁိူဝ်ႉပၼ် ဢၼ်ပဵၼ်လၢႆး ယွမ်းယွၼ်ႇလွင်ႈတဵၵ်းတဵင်ၸႂ် ၼၼ်ႉယူႇယဝ်ႉ။

ၶေႃႈပၼ်ပၢႆးဝူၼ်ႉ ၾၢၵ်ႇထိုင်ၵေႃႉၶႂ်ႈပဵၼ် ပေႃႈလုၵ်ႈဢွၼ်ႇ

ၶေႃႈတီႈဢၼ် ပေႃႈလုၵ်ႈဢွၼ်ႇ တေလႆႈႁဵတ်းသၢင်ႈၸွမ်းသေ ထုၵ်ႇလီလႆႈငိူင်ႉဝႄႈ ပိူဝ်ႈတႃႈႁႂ်ႈ ၼၢင်းမေးၸဝ်ႈၵဝ်ႇ ၸၢင်ႈၸဵဝ်းၸပ်းသၼ်ႇထေႇလႆႈ ၶၼ်ၶၼ်ဝႆးဝႆးၼၼ်ႉၵေႃႈ ဢမ်ႇထုၵ်ႇလီဢၢပ်ႇၼမ်ႉမႆႈ၊ ဢမ်ႇထုၵ်ႇလီၼုင်ႈၵူၼ် ၼႂ်းလႄႈၼွၵ်ႈ ဢၼ်ႁတ်ႉၸပ်းတူဝ် ႁႅင်းၼႃႇပူၼ်ႉ၊ ဢမ်ႇထုၵ်ႇလီဢဝ် ၶွမ်ႇပိဝ်ႇတႃႇ (Laptop Computer) တၢင်ႇၼိူဝ်ၶႃလူင်သေ ၸႂ်ႉၵၢၼ်၊ ၸိူဝ်းၼႆႉထုၵ်ႇလီလႆႈငိူင်ႉဝႄႈပၼ်၊ ယွၼ်ႉဝႃႈၶေႃႈၸိူဝ်းၼႆႉ ၸၢင်ႈႁဵတ်းႁႂ်ႈ ၶႆႇႁမ်(Testicle) မႆႈမႃးသေယဝ်ႉ ႁဵတ်းႁႂ်ႈၼမ်ႉၸိူဝ်ႉၼၼ်ႉ ဢႄႇယွမ်းလႆႈ။

လိူဝ်သေၼၼ်ႉ ထုၵ်ႇလီလႆႈငိူင်ႉဝႄႈပၼ် လွင်ႈလုတ်ႇလႅၼ်းယႃႈ၊ ၵိၼ်လဝ်ႈ လႄႈ သူႇသမ်းယႃႈမဝ်းၵမ်၊ ယွမ်းၵိၼ်ပႃး ထၢတ်ႈၵၽိၼ်း၊ ၶေႃႈလွင်ႈယႂ်ႇမၼ်း ထႅင်ႈဢၼ်ၼိုင်ႈသမ်ႉ ထုၵ်ႇလီလႆႈၵိၼ်ပၼ် ယႃႈႁႅင်းၵူႈဝၼ်း တႃႇတေလႆႈ ထၢတ်ႈဢႃႇႁႃႇရ တဵမ်တဵမ်ထူၼ်ႈထူၼ်ႈ ၼင်ႇႁိုဝ်တေၵႂႃႇပဵၼ်လွင်ႈ ၵမ်ႉထႅမ်ပၼ် ႁႅင်းၸပ်းလႆႈၸိူဝ်ႉၽၼ်း သၼ်ႇထေႇယူႇ။

ၸွမ်းၼင်ႇၽူႈၶူၼ်ႉၶႂႃႉၶဝ် လႆႈၶူၼ်ႉၶႂႃႉႁၼ်မႃးတႄႉ ၵူႈဢၼ်ၶတ်းၸႂ် ၼိုင်ႈပွၵ်ႈသွင်ပွၵ်ႈသေ ၸပ်းသထေႇလႆႈ ၵႂႃႇလီငၢမ်းၼၼ်ႉ ပဵၼ်ၵူၼ်းၸိူဝ်းမီး ပၢႆးယူႇလီတဵမ်ထူၼ်ႈ ၶဝ်ၵမ်ႈၼမ် သေတႃႉၵေႃႈ ၵူၺ်းၵႃႈ ၼႂ်းၼိုင်ႈလိူၼ်လႂ် ၸၢင်ႈၸပ်းသၼ်ႇထေႇလႆႈ မွၵ်ႈ 20-25 ပိူဝ်းသႅၼ်း(%)ၵူၺ်း၊ တႃႇၵူႈၸိူဝ်းၶတ်းၸႂ် ႁိုင်ထိုင် 12-လိူၼ်ၶိုၼ်ႈၼိူဝ်သေ သမ်ႉပႆႇလႆႈလုၵ်ႈလၢင်း ၼၼ်ႉတႄႉ ထုၵ်ႇလီလႆႈၵႂႃႇယွၼ်းတၢင်းၸွႆႈထႅမ် ဢုပ်ႇဢူဝ်းတီႈ မေႃယႃၵတ်ႉၶႅၼ်ႇ ၽၢႆႇၵိူတ်ႇလုၵ်ႈၶဝ် လီတီႈသုတ်းယဝ်ႉ။

ယိူင်းဢၢၼ်းတႃႇႁႂ်ႈ ပဵၼ်လွင်ႈၵမ်ႉၸွႆႈ ပိုၼ်ႉႁူႉပၢႆးယူႇလီသေ ၼင်ႇႁိုဝ် ပီႈၼွင်ႉဢူၺ်းၵေႃႉ ၵူၼ်းမိူင်းတႆးတင်းၼမ် ပေႃးတေလႆႈလဵပ်ႈႁဵၼ်းဢၢၼ်ႇ ၶဝ်ႈတၢင်းတိုဝ်း ႁဵတ်းၽွၼ်းလီ တႃႇတူဝ်ၵဝ်ႇၼၼ်ႉ ၶႃႈႁဝ်း ၸၢႆးတႆးမၢဝ်း ၸင်ႇလႆႈ ႁိမ်ဢဝ်ၶၢဝ်းယၢမ်းလိုဝ်ႈႁိူဝ်ႉသေ ၶတ်းၸႂ်သွၵ်ႈႁႃပိၼ်ႇတႅမ်ႈ မႃးတီႈ ပၢႆးယူႇလီ Prime Rehabilitation Aids ယူႇယဝ်ႉ။

ၸွႆႈပိုၼ်ႈၽႄႈ(Share) ပိုၼ်ႉႁူႉပၢႆးယူႇလီပၼ်ၵူၼ်းတင်းၼမ်သေ ႁပ်ႉဢဝ်ၵူႉသူဝ်ႇလႆႈယူႇၶႃႈဢေႃႈ 😊

ၸၢႆးတႆးမၢဝ်း