ဢၢပ်ႇၼမ်ႉတၢမ်းၶမ်ႈ ယဝ်ႉၸင်ႇၶဝ်ႈၼွၼ်း မီးၽွၼ်းလီတူဝ်ၵဝ်ႇၼႆ ၸွင်ႇၾၢင်ႉမႅၼ်ႈ

ၵူၼ်းႁဝ်းၵူႈၵေႃႉၵေႃႈ ႁူႉၵႃႈၶႂ်ႈႁႂ်ႈတူဝ်ၶိင်းၸဝ်ႈၵဝ်ႇ ၼုမ်ႇၼုတ်းၵဵင်ႈသႂ်လီ မိူၼ်ၵၼ်ၵူႈၵေႃႉ ႁင်းၽႂ်မၼ်းယူႇ၊ လွင်ႈဢၢပ်ႇၼမ်ႉၼႆႉၵေႃႈ ပႃးၼႂ်းၶၵ်ႉတွၼ်ႈ ႁဵတ်းႁႂ်ႈတူဝ်ၶိင်းၸဝ်ႈၵဝ်ႇ ၼုမ်ႇၼုတ်းၵဵင်ႈသႂ်လီ ပိူင်ႈၼိုင်ႈ မိူၼ်ၵၼ်လႄႈ ပေႃးၼၼ် ႁဝ်းမႃးလဵပ်ႈႁဵၼ်းတူၺ်း သင်ဢၢပ်ႇၼမ်ႉတၢမ်းၶမ်ႈယဝ်ႉ ၸင်ႇၶဝ်ႈၼွၼ်းၸိုင် မီးလွင်ႈငမ်ႇမႅၼ်ႈၸွမ်း ပၢႆႇယူႇလီၸဝ်ႈၵဝ်ႇ ၸိူင်ႉႁိုဝ်လၢႆလၢႆၽွင်ႈၼႆ။

ဢၢပ်ႇၼမ်ႉၼႆႉ ၸွႆႈႁဵတ်းႁႂ်ႈတူဝ်ၶိင်းၸဝ်ႈၵဝ်ႇ ႁၢႆလႆႈလွင်ႈႁိူဝ်ႉမွႆႈ၊ ဢၼ်တူဝ်လႄႈၸႂ်ၸဝ်ႈၵဝ်ႇ ႁဵတ်းၵၢၼ် လႆႈႁိူဝ်ႉဢူၼ်ႈမႃး တင်းဝၼ်းၸိူဝ်းၼၼ်ႉ သင်ထိုင်ႁူဝ်ၶမ်ႈမႃး ထုၵ်ႇလႆႈႁႃလၢႆးေသလွင်ႈ မႄးႁဵတ်းႁႂ်ႈ ၸိုၼ်ႈၸၢင်ႇလီၶိုၼ်းယူႇ၊ သင်ဢၢပ်ႇၼမ်ႉတၢမ်းၶမ်ႈ ပႅတ်ႈမၼ်းၼႆတႄႉ တေၸွႆႈႁဵတ်းႁႂ်ႈ ဢဵၼ်ႁႅင်းၶၢမ်ႇတူဝ်ၶိင်း လႄႈ ပၢႆးၸႂ်ၸဝ်ႈၵဝ်ႇ မႄးၶိုၼ်ႈသုင်လီမႃးၶိုၼ်းလႆႈ။

ၵဵဝ်ႇလွင်ႈဢၢပ်ႇၼမ်ႉတၢမ်းၶမ်ႈၼႆႉတႄႉ ၵူၼ်းႁဝ်းမီးတၢင်းႁၼ်ပႅၵ်ႇပိူင်ႈၵၼ် တင်းၼမ်ယူႇမိူၼ်ၵၼ်၊ ၵမ်ႈၽွင်ႈတႄႉဝႃႈ သင်ဢၢပ်ႇၼမ်ႉတၢမ်းၶမ်ႈၸိူင်ႉၼႆ တေၸၢင်ႈတုမ်ႉတိူဝ်ႉ တူဝ်ၶိင်းၸဝ်ႈၵဝ်ႇ၊ မီးလွင်ႈထၢင်ႇထိူမ်ဝႃႈ တေၸၢင်ႈ ၶႆႈၼၢဝ်လႆႈလႄႈ ၸပ်းတၢင်းပဵၼ်လူးၵွၼ်ႇ၊ ၵူၺ်းၵႃႈ လွင်ႈၼႆႉ သင်ထၢမ်ၸဝ်ႈပၢႆးမေႃၶဝ်ဝႃႈ ၸွင်ႇၸၢင်ႈမီးလွင်ႈတုမ်ႉတိူဝ်ႉသင် ၼႆၸိုင် တေလႆႈၶေႃႈတွပ်ႇ ၶေႃႈလဵဝ်ဝႃႈ ဢမ်ႇ(NO) ၼႆၵမ်းသိုဝ်ႈယဝ်ႉ၊ ၽၢႆႇၽူႈလူင်ႉလၢႆႉပၢႆးသၢႆၶဝ်ၵေႃႈဝႃႈ  ဢမ်ႇလႆႈႁၼ်မီး ၶေႃႈႁပ်ႉႁွင်းသင် ၵဵဝ်ႇလွင်ႈဢၢပ်ႇၼမ်ႉတၢမ်းၶမ်ႈသေ တေၸၢင်ႈႁဵတ်းႁႂ်ႈ မီးလွင်ႈတုမ်ႉတိူဝ်ႉ တူဝ်ၵဝ်ႇ ၼႆယူႇ။

ပေႃးၼၼ် ႁဝ်းမႃးလဵပ်ႈႁဵၼ်းတူၺ်းဝႃႈ ဢၢပ်ႇၼမ်ႉတၢမ်းၶမ်ႈၼႆႉ သမ်ႉမီးၽွၼ်းလီသင်ၼႆ လူးၵွၼ်ႇ-

သင်ဢဝ်ၼမ်ႉဢုၼ်ႇဢုၼ်ႇဢွၼ်ႇ ဢၢပ်ႇပၼ်ၸိုင် တေၸၢင်ႈပၢၵ်ႈဢီးပႅတ်ႈ ထၢတ်ႈၵွင်ႉ ဢၼ်မီးၼိူဝ်ၽိဝ်ၼင်ႁဝ်း ႁႂ်ႈၵဵင်ႈသႂ်လီ၊ မိူဝ်ႈႁဝ်းပႆႇၼွၼ်းၼၼ်ႉ တေမီးလွင်ႈၸိုၼ်ႈၸၢင်ႇသေယဝ်ႉ တေလႆႈႁပ်ႉ လွင်ႈဢူၼ်ႈၼူၼ်းၵဵင်ႈသႂ်လီငၢမ်း၊ တေႁဵတ်းႁႂ်ႈ လွင်ႈတဵၵ်းတဵင်ၸႂ်ႁဝ်း ႁူင်ႈႁၢႆလၢႆၵႂႃႇသေ ၼမ်ႉၼၵ်းလိူတ်ႈ တေယွမ်းလူင်း၊ တေၶိုၼ်းမႄးထႅမ်ပၼ် ဢဵၼ်ႁႅင်းၶၢမ်ႇတူဝ် ဢၼ်ႁဝ်းႁဵတ်းၵၢၼ် ႁိူဝ်ႉဢူၼ်ႈမႃးတင်းဝၼ်း ၸိူဝ်းၼၼ်ႉ၊ ပႅၵ်ႉသမ်ႉဝႃႈ လဵၼ်ႈဢဵၼ်ႁႅင်းသေ ၽိဝ်ၼင်ႁဝ်းၵႅၼ်ႇၶႅင် ဝႆႉသေတႃႉ တေၸၢင်ႈၶိုၼ်းမႄးႁဵတ်းႁႂ်ႈ ဢူၼ်ႈၼူၼ်းႁၢႆၵႂႃႇ ယွၼ်ႉလႆႈဢၢပ်ႇၼမ်ႉ။ သင်လႆႈဢၢပ်ႇပၼ်ၼမ်ႉဢုၼ်ႇၸိုင် ၽိဝ်ၼင်ၸဝ်ႈၵဝ်ႇ တေဢူၼ်ႈဢွၼ်ႇလီ လႄႈ ဝၢႆးဢၢပ်ႇၼမ်ႉယဝ်ႉ ၵမ်ႈသိုဝ်ႈၼၼ်ႉ ၸဝ်ႈၵဝ်ႇတေလႆႈႁပ်ႉလွင်ႈ ၸိုၼ်ႈသႂ်ၼုမ်ႇၼုတ်း၊ ၶၢဝ်းယၢမ်းၵႅပ်ႉၵမ်းဢွၼ်ႇ မိူဝ်ႈတိုၵ်ႉဢၢပ်ႇၼမ်ႉ ဝႆႉယူႇၼၼ်ႉၵေႃႈ တေႁဵတ်းႁႂ်ႈ လွင်ႈမႆႈၸႂ်ႁဝ်း ႁၢႆလၢႆၵႂႃႇလႆႈ မိူၼ်ၵၼ်၊ လွင်ႈလီဢၢမ်းထႅင်ႈဢၼ်ၼိုင်ႈၼႆႉတႄႉ ဢၢပ်ႇၼမ်ႉတၢမ်းၶမ်ႈၼႆႉ ပၼ်ႁႂ်ႈဢၢႆႊသႅဝ်တူဝ်ၶိင်းႁဝ်း မီးဢၢႆႊႁွမ်ဢၢႆႊႁူၺ်း ၼၼ်ႉယဝ်ႉ။

လွင်ႈလႆႈႁပ်ႉ ၽိဝ်ၼင်ဢူၼ်ႈဢွၼ်ႇ ဢၼ်မီးလွင်ႈၵဵင်ႈသႂ်လႅတ်းသႅဝ်း လႄႈ လွင်ႈမီးဢၢႆႊသႅဝ်ႁွမ်ႁူၺ်း ၸွမ်းတူဝ်ၶိင်းႁဝ်းၼႆႉ ၸွႆႈထႅမ်ပၼ်မိူဝ်ႈႁဝ်းၶဝ်ႈၼွၼ်းၼၼ်ႉ ႁႂ်ႈမီးလွင်ႈၵတ်းယဵၼ်သုၶ ၸဵမ်တူဝ်လႄႈၸႂ်၊ ယွၼ်ႉၼၼ် ပၼ်ႁႂ်ႈႁဝ်းၼွၼ်းလပ်းလႆႈလီလီငၢမ်းငၢမ်း၊ လွင်ႈၼွၼ်းဢမ်ႇလပ်း လႄႈ လွင်ႈၵင်ႁူၵႂင်တႃၸိူဝ်းၼႆႉၵေႃႈ တေဢမ်ႇမေႃမီး၊ ၵႂႃႇႁဵတ်းၵၢၼ်ႁိူဝ်ႉမႃးယဝ်ႉ ၸပ်းပႃးတင်းႁိူဝ်ႇၶႆးသေ ယႃႇပေၵိုင်ႉၵၢင်ႉၶဝ်ႈၼွၼ်းၵမ်းလဵဝ်၊ ၼင်ႇႁိုဝ်တေႁၢႆလွင်ႈႁိူဝ်ႉ တူဝ်လႄႈတင်းၸႂ်လႆႈလႄႈ တေမီးမႃႇႁႅင်းမႃးၶိုၼ်းၼၼ်ႉ ဢၢပ်ႇၼမ်ႉသေ ၸင်ႇၼွၼ်းၼႆႉ လီထိသုတ်း၊ ၼႂ်းၶၢဝ်းတၢင်း ၼိုင်ႈဝူင်ႈဝၢင်ႈဢွၼ်ႇၸိူဝ်းၼႆႉ ၸဝ်ႈၵဝ်ႇတေလႆႈႁပ်ႉႁၼ် လွင်ႈလႅၵ်ႈလၢႆႈ ၽွၼ်းလီတူဝ်ၵဝ်ႇမႃး ႁင်းၵမ်းလွႆးလွႆးယူႇ။

ၵူၺ်းၵႃႈ မိူဝ်ႈတေဢၢပ်ႇၼမ်ႉတၢမ်းၶမ်ႈၼၼ်ႉတႄႉ တေလႆႈၾၢင်ႉႁူႉၵၼ်ဢိတ်းဢွၼ်ႇၼိုင်ႈ သင်သၢႆႇၶူၼ်ႁူဝ်ၸိုင် မိူဝ်ႈပႆႇၼွၼ်းၼၼ်ႉ ၸဵတ်ႉႁႂ်ႈမၼ်းႁႅင်ႈယဝ်ႉလီငၢမ်းသေ ၸင်ႇၶဝ်ႈၼွၼ်း၊ လူမ်းမႆႈၼႂ်းတူဝ်ၸဝ်ႈၵဝ်ႇၼၼ်ႉ ယႃႇလိုမ်းၾၢင်ႉႁူႉဝႃႈ မၼ်းလူတ်းယွမ်းလိူဝ်သေ ၶၢဝ်းၵၢင်ဝၼ်း၊ သင်ဝႃႈႁဵတ်းၵၢၼ်ဢွၵ်ႇႁိူဝ်ႇမႃးႁိုဝ် ဢမ်ႇၼၼ် လဵၼ်ႈဢဵၼ်ႁႅင်းသေ ဢွၵ်ႇႁိူဝ်ႇမႃးၸိူဝ်းၼႆႉ ႁူးႁိူဝ်ႇၼိူဝ်ၽိဝ်ၼိူဝ်ႉႁဝ်းၼၼ်ႉ တေၵႂၢင်ႈဝႆႉလႄႈ ယႃႇပေၵိုင်ႉၵၢင်ႉဢၢပ်ႇၼမ်ႉၵမ်းသိုဝ်ႈ ထုၵ်ႇလီလႆႈပႂ်ႉ မွၵ်ႈ 30-မိၼိတ်ႈယဝ်ႉ ၸင်ႇၵွႆႈဢၢပ်ႇ၊ သင်ဢၢပ်ႇၼမ်ႉႁၢမ်ႉလိုၵ်းၸိုင် ထုၵ်ႇလႆႈဢၢပ်ႇပၼ် ၼမ်ႉဢုၼ်ႇဢုၼ်ႇ၊ မိူဝ်ႈပႆႇလႆႈဢၢပ်ႇၼမ်ႉဢုၼ်ႇၼၼ်ႉ ထုၵ်ႇလီဢဝ်မိုဝ်း တႅၵ်ႈႁႅင်းၼမ်ႉမႆႈ ဢွၼ်တၢင်း၊ ၵူၼ်းႁဝ်းတေႁပ်ႉလိူဝ်လႆႈထၢတ်ႈမႆႇ ဢၼ်ပူၼ်ႉသေ ထၢတ်ႈမႆႈတူဝ်ၶိင်းႁဝ်း 5-တီႇၵရီႇယူႇ၊ ယွၼ်ႉပိူဝ်ႈၵူၼ်းၼိုင်ႈၵေႃႉၼႆႉ တေမီးထၢတ်ႈမႆႈၼႂ်းတူဝ် 97 တီႇၵရီႇ ၽႃႇရိၼ်ႇႁၢႆႉ၊ 36 တီႇၵရီႇ သျႄးသျီးယျႅပ်ႉ လႄႈ ထုၵ်ႇလႆႈလိူူၵ်ႈ ၼမ်ႉဢၼ်ဢမ်ႇမႆႈႁႅင်း ဢမ်ႇၵတ်းႁႅင်း ၼမ်ႉဢုၼ်ႇဢုၼ်ႇဢွၼ်ႇ ၸိူင်ႉၼၼ်။

ၶေႃႈတိုၼ်း- ဝိၼ်းလၢႆႇဢူး (ပိုၼ်ႉႁူႉပၢႆးယူႇလီ ၸိူဝ်းလႆႈဢၢၼ်ႇမႃး)

ၸၢႆးတႆးမၢဝ်း